Silasiorneq
Sermersuup isorartunerujussua pissutaalluni nuna ataatsimut isigalugu issittumik silaannalittut taasariaqarpoq, ukiullu qaammataani kiannerpaaffiusumi kiassusia agguaqatigiissillugu 10° C qaangissanagit. Sumiiffinni ataasiakkaani, soorlu Narsarsuarmi Kangerlussuarmilu silaannaq kiattup issittullu akornannut qanittumiittuupput aasallu qaammataani agguaqatigiissillugu kiassusaat 10° C sinnersinnaasarlugu. Nunap isorartunerujussua pissutaalluni Kalaallit Nunaata Avannaani Kujataanilu sila assigiinngeqisumik allanngorartuuvoq, sinerissamili nunat avasissuniittut timerpasinnerusullu, pingaartumik sikuusanngitsumi, nunallu timaaniittut annertuumik assigiinngissuteqartarput. Aasaanerani imaq silaannarmik nillataartitsisarpoq ukiuuneranilu nerumitsitsisarluni. Taamaammat sinerissami sikuneq ajortumi ukiuunerani aasaaneranilu kiassutsit assigiinngissutaat annikinneruvoq, nunaviullu silaannaanik silaannaqartumut qanilliartortilluni assigiinngissut annertusiartortarpoq. Kalaallit Nunaanni tamarmi aasaanerani kiassuseq assigiiaartorujussuuvoq, piffissami seqernup kaaviinnalerneraniit (qaasuitsup killiaqarfiata avannaatungaani) kiak annertooq pissutigalugu.
Kalaallit Nunaanni nittaalaq/sialuk allanngorartorujussuuvoq. Kalaallit Nunaata Kujataani illoqarfinni sinerissamiittuni ukiumut nittaalaq/sialuk 800 mm-ip miss. 1.400 mm-imut annertussuseqarpoq. Avannarpasinnerusumi aammalu nunap timaani nittaalaq/sialuk annikilleriarujussuartarpoq. Avannarpasinnerpaani timerpasissumilu ukiumut nittaallap/sialuup 200 mm inorpaa. Sumiiffinni ataasiakkaani soorlu Pearylandimi nunatta avannaarpiarsuaniittumi nittaalaq/sialuk ima annikitsigaaq tamanna ilaatigut issittup inoqajuitsuatut taaneqarsinnaalluni.
Najoqqutaq aaqqissoruk
- Naatsorsueqqissaartarfik, Kalaallit Nunaat 2000 - Ukiumoortumik kisitsisitigut paasissutissat, immikkoortoq 3.2
Linkit aaqqissoruk
 |
Wikimedia Commons assinik nipinilluunniit peqarpoq, uunga tunngasunik: |
 |
Una allaaserisaq tannerusinnaagunaraluarpoq. Wikipedia ikiorsinnaavat ilagukku. |